У Магілёве распачата будаўніцтва Ратушы
5 августа 2007
Вертыкальнікі абяцаюць адкрыць яе праз год, на свята горада. Там плануецца размясціць музей і залу для ўрачыстых цырымоній.
Новы будынак узвядуць на валу каля Дняпра, дзе калісьці амаль тры стагоддзі прастаяў трывалы каменны будынак Ратушы, справа рук магілёўскіх і шклоўскіх майстроў другой паловы 18-га стагоддзя. Ён лічыўся адным з лепшых помнікаў гарамадзянскай архітэктуры Беларусі.
У другую сусветную вайну будынак пашкодзілі, і хаця спачатку яго нібыта ўзяліся адраманатаваць, але потым улады, відаць, вырашылі не марнаваць вялікія сродкі.
Роўна паўстагоддзя таму, на золку ліпеньскага дня 1957 года старажытную Ратушу знішчылі выбухам, а вежу, з якой калісьці аглядалі горад руская імператрыца Кацярына Другая і аўстрыйскі імператар І осіф Другі, павалілі з дапамогай тросаў і трактараў.
Яшчэ ў 1992 годзе на тым месцы адбылася ўрачыстая закладка сімвалічнага першага камяня ў новы падмурак. Аднак потым улада змянілася, грошай не ставала і будаўніцтва так і не распачалося.
Цяпер жа ўсё сур’ёзна. Днямі збяруцца дэпутаты гарсавета, каб даць адпаведны дазвол, а тым часам будаўнічая арганізацыя, якая выйграла тэндэр, ужо агарадзіла будаўнічую пляцоўку і пачала працаваць.
Свой унёсак у агульную справу зрабілі і магілёўскія гісторыкі, якія на нядаўняй канферэнцыі "Гісторыя Магілёва: мінулае і сучаснасць" прапанавалі арганізаваць агульнагарадскі суботнік і адкрыць разліковы рахунак для збору сродкаў на аднаўленне Ратушы. Гарвыканкам папярэдне падлічыў, што яна абыдзецца прыкладна ў пяць мільярдаў рублёў.